ଶରୀରକୁ ସୁସ୍ଥ ରଖିବାକୁ ଆଜିକାଲି ସମସ୍ତେ ଚେଷ୍ଟା ଚଳାଇଛନ୍ତି। କିଏ ପ୍ରତିଦିନ ଯୋଗ, ପ୍ରାଣାୟାମ କରୁଛି ତ ଆଉ କିଏ ଖାଦ୍ୟପେୟ ଉପରେ ବିଶେଷ ଧ୍ୟାନ ଦେଉଛି। ତେବେ ବେଳେବେଳେ ଯେତେ ଖାଇବା ପିଇବା ଉପରେ ଧ୍ୟାନ ଦେଲେ ମଧ୍ୟ ହୃଦୟ ସମ୍ବନ୍ଧୀୟ ରୋଗର ଆଶଙ୍କା କମିନଥାଏ। ଏହା ପଛର କାରଣ ହେଉଛି ଖାଦ୍ୟରେ ବ୍ୟବହାର ହେଉଥିବା ତେଲ। ଖାଦ୍ୟ ପ୍ରସ୍ତୁତି କରିବାରେ ବ୍ୟବହାର ହେଉଥିବା ତେଲ ସ୍ୱାସ୍ଥ୍ୟ ଖରାପ କରିବାରେ ଏକ ପ୍ରମୁଖ ଭୂମିକା ଗ୍ରହଣ କରିଥାଏ। ତେବେ ଖାଦ୍ୟ ପ୍ରସ୍ତୁତିରେ ଯଦି ଆମେ କେତେକ ସାଧାରଣ ତେଲ ବ୍ୟବହାର କରିବା ତେବେ ହୃଦ୍ ରୋଗର ଆଶଙ୍କା ରହିବ ନାହିଁ। ଆସନ୍ତୁ ଜାଣିବା ସେ ସମ୍ପର୍କରେ…
ଅଳସୀ ତେଲ: ରୋଷେଇରେ ବ୍ୟବହାର କରିବା ପରିବର୍ତ୍ତେ ଅଳସୀ ତେଲକୁ ସାଲାଡ୍ କିମ୍ବା ସ୍ମଦିରେ ବ୍ୟବହାର କଲେ ଏହା ଅଧିକ ହିତକର ହୋଇଥାଏ। କାରଣ ରାନ୍ଧିବା ପରେ ଅଳସୀ ତେଲର ସ୍ୱାଦରେ ପରିବର୍ତ୍ତନ ଘଟିଥାଏ ଯାହା କିଛି ଲୋକଙ୍କୁ ପସନ୍ଦ ଆସେନାହିଁ। ଏଣୁ ସାଲାଡ୍ରେ ବ୍ୟବହାର କଲେ ଏହାର ସ୍ୱାଦ ଅପରିବର୍ତ୍ତିତ ରହେ। ଅଳସୀ ତେଲରେ ଆଲ୍ଫା ଲିନୋଲିକ୍ ଏସିଡ୍ ରହିଥାଏ, ଯାହା ଓମେଗା-୩ ଫ୍ୟାଟି ଏସିଡ୍ ଏକ ଅଂଶ। ଅଳସୀ ତେଲ ସେବନ କରିବା ଦ୍ୱାରା ଇନ୍ଫ୍ଲେମେସନ୍ ଭଳି ଗମ୍ଭୀର ରୋଗର ଆଶଙ୍କା କମ୍ ରହିଥାଏ।
ଆଭୋକାର୍ଡୋ ତେଲ: ଆଭୋକାର୍ଡୋ ତେଲ ଅନେକ ସ୍ୱାସ୍ଥ୍ୟ ସମ୍ବନ୍ଧୀୟ ସମସ୍ୟା ଦୂର କରିବାରେ ସାହାଯ୍ୟ କରେ। ଏହା ଏକ ଅଶୋଧିତ ତୈଳ, ତେଣୁ ଏଥିରେ ସମସ୍ତ ଆବଶ୍ୟକୀୟ ପୋଷକ ତତ୍ତ୍ୱ ମହଜୁଦ୍ ଥାଏ। ଆଭୋକାର୍ଡୋ ତେଲରେ ଭିଟାମିନ୍ ଇ, ପଲିଅନ୍ସାଚ୍ୟୁରେଟେଡ୍ ଫ୍ୟାଟି ଏସିଡ୍ ଏବଂ ମନୋଅନ୍ସାଚ୍ୟୁରେଟେଡ୍ ଫ୍ୟାଟି ଏସିଡ୍ ଅଧିକ ମାତ୍ରାରେ ରହିଥାଏ। ଏଣୁ ହୃଦୟ ପାଇଁ ଏହା ଅତ୍ୟନ୍ତ ଉତ୍ତମ ହୋଇଥାଏ।
ରାଶି ତେଲ: ରାଶି ତେଲର ଅନେକ ଫାଇଦା ରହିଛି। ରାଶି ତେଲ ଖାଦ୍ୟର ସ୍ୱାଦକୁ ଦୁଇ ଗୁଣିତ କରିଥାଏ। ରାଶି ତେଲରେ ମଧ୍ୟ ପଲିଅନ୍ସାଚ୍ୟୁରେଟେଡ୍ ଏବଂ ମନୋଅନ୍ସାଚ୍ୟୁରେଟେଡ୍ ଫ୍ୟାଟି ଏସିଡ୍ ମହଜୁଦ୍ ରହିଛି, ଯାହା ଶରୀରରେ ଥିବା ଖରାପ କୋଲୋଷ୍ଟ୍ରଲକୁ କମ୍ କରେ। ଏହି ତେଲକୁ ଖାଦ୍ୟ ପ୍ରସ୍ତୁତିରେ ନିୟମିତ ବ୍ୟବହାର କଲେ ହୃଦ୍ରୋଗର ସମ୍ଭାବନା କମିଥାଏ।
ଅଲିଭ ତେଲ: ହୃଦୟକୁ ସୁସ୍ଥ ରଖିବାରେ ଅଲିଭ ତେଲ ସାହାଯ୍ୟ କରିଥାଏ। ଏଥିରେ ମନୋଅନ୍ସାଚ୍ୟୁରେଟେଡ୍ ଫ୍ୟାଟି ଏସିଡ୍ ଅଧିକ ମାତ୍ରାରେ ରହିଥାଏ। ଏଣୁ ହାର୍ଟ ପାଇଁ ଏହା ରାମବାଣ ସଦୃଶ କାମ କରେ।