ଦେଶରେ ଦରଦାମ ଆକାଶ ଛୁଆଁ ହୋଇଥିବା ବେଳେ ଓ ବେକାରୀ ସମସ୍ୟାରେ ଜର୍ଜରିତ ଯୁବକଯୁବତୀମାନେ ନିରାଶାରେ ହାହାକାର କରୁଥିବା ବେଳେ, ଗତକାଲି ମାହାଙ୍ଗାରେ ଏକ ସଭା ଓ ଶୋଭାଯାତ୍ରାକୁ ସମ୍ବୋଧିତ କରି କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ କହିଛନ୍ତି ଯେ ନରେନ୍ଦ୍ର ମୋଦି ମହାନ, ତାଙ୍କ ଭଳି ପ୍ରଧାନମନ୍ତ୍ରୀ ଆଗରୁ କେବେ କେହି ନଥିଲେ ! ପୂର୍ବରୁ ନିଜକୁ ମୋଦିଙ୍କ ହନୁମାନ ଭାବେ ଅଭିହିତ କରିଥିବା ଧର୍ମେନ୍ଦ୍ର ମୋଦୀ ସରକାରର ୮ବର୍ଷ ପୂର୍ତ୍ତି ଉପଲକ୍ଷେ କାଲି କଟକ ଜିଲ୍ଲା ମାହାଙ୍ଗା ପୋଡାମରାଇଠାରେ ଆୟୋଜିତ ‘ଗରିବ କଲ୍ୟାଣ ସଭା’ରେ ବିଜେପି କର୍ମୀଙ୍କ କାନରେ ମୋଦିଙ୍କ ବିକାଶ ମନ୍ତ୍ର ଫୁଙ୍କି କହିଛନ୍ତି ଯେ ଓଡ଼ିଶାର ୧ କୋଟି ପରିବାରଙ୍କ ଘରେ ସମ୍ପନ୍ନତା ଓ ସ୍ୱାଭିମାନ ପହଁଚାଇବା ପାଇଁ ପ୍ରଧାନମନ୍ତ୍ରୀ ଯେଉଁ ସଂକଳ୍ପ କରିଛନ୍ତି,ତାହାକୁ ପୁରଣ କରିବା ଦିଗରେ ସବୁ ବିଜେପି ନେତା ଓ କର୍ମୀ ଲାଗି ପଡିବା ଦରକାର। ଏହି ସଭାରେ ସେ ଓଡ଼ିଶାର ବିଜେଡି ସରକାରକୁ ଲୁଟମାର ଅହଂକାରୀ ବୋଲି ଆକ୍ଷେପ କରି କଟୁ ସମାଲୋଚନା କରିଛନ୍ତି ।
