ବିରୋଧୀଙ୍କ ଏକତା ଉପରେ ସନ୍ଦେହ ପ୍ରକଟ କରି ନିର୍ବାଚନ ରଣନୀତିକାର ପ୍ରଶାନ୍ତ କିଶୋର କହିଛନ୍ତି ଯେ ବିପକ୍ଷ ଦଳଗୁଡିକ ଏକାଠି ନହେଲେ ଆଗାମୀ ନିର୍ବାଚନରେ ଭାରତୀୟ ଜନତା ପାର୍ଟିକୁ ହରାଇବା ଅସମ୍ଭବ । କଂଗ୍ରେସ ଦଳ ନିର୍ବାଚନ ପୂର୍ବରୁ ନିଜର ସ୍ଥିତିକୁ ମଜବୁତ କରିବା ଦରକାର, ମାତ୍ର କଂଗ୍ରେସ ନେତା ଦଳର ସ୍ଥିତି ସୁଦୃଢ଼ ନକରି ନିର୍ବାଚନରେ ଅବତୀର୍ଣ୍ଣ ହେଉଛନ୍ତି ଓ ବିଜୟ ପାଇଁ ଉଦ୍ୟମ କରୁଛନ୍ତି ବୋଲି ଉଲ୍ଲେଖ କରି ସେ କହିଛନ୍ତି ଯେ ଏହି କାରଣ ପାଇଁ ହିଁ ଦଳ ବାରମ୍ବାର ପରାଜୟର ସମ୍ମୁଖୀନ ହେଉଛି। ଏହା ସହିତ ପ୍ରଶାନ୍ତ କିଶୋର ବିପକ୍ଷ ନେତାଙ୍କ ଏକତାକୁ ନେଇ ସନ୍ଦେହ ପ୍ରକାଶ କରି କହିଛନ୍ତି ଯେ ବିରୋଧୀ ଦଳ ଏକାଠି ହୋଇ ଏକ ବୈଚାରିକ ଏକତା ମେଣ୍ଟ କରିବା ଦରକାର, ଯାହା ହୋଇପାରୁ ନାହିଁ ବା ହେବାପରି ଦିଶୁନାହିଁ।
